काठमाडौं । आफूले अर्थ मन्त्रालयमा एक जना मात्रै अवैतनिक राजस्व सल्लाहकार नियुक्त गरेको अर्थमन्त्री डा. स्वर्णिम वाग्लेले बताएका छन्।
मंगलबार अर्थ मन्त्रालयमा आयोजित वार्षिक राजस्व समीक्षा बैठकलाई सम्बोधन गर्दै उनले अन्य मन्त्रालय र निकायको तुलनामा आफूले न्यून संख्यामा सल्लाहकार राखेको उल्लेख गरे। उनले राजस्व क्षेत्रलाई प्राथमिकतामा राख्दै एक जना अवैतनिक राजस्व सल्लाहकार मात्र नियुक्त गरिएको बताए।
वाग्लेले सम्बोधनका क्रममा प्रधानमन्त्री तथा मन्त्रिपरिषद्को कार्यालयमा २७ जना र ऊर्जा मन्त्रालयमा २० जना सल्लाहकार रहेको उल्लेख गर्दै आफूले भने एक जना मात्रै सल्लाहकार राखेको बताए।
उनले भने, "प्रधानमन्त्री कार्यालयमा २७ जना र ऊर्जा मन्त्रालयमा २० जना सल्लाहकार हुनुहुन्छ। तर मैले केवल एक जना अवैतनिक राजस्व सल्लाहकार मात्र राखेको छु। यसबाट मैले राजस्वको विषयलाई कति महत्त्व दिएको छु भन्ने बुझ्न सकिन्छ।"
उनको यो अभिव्यक्ति प्रधानमन्त्री तथा मन्त्रिपरिषद्को कार्यालयमा सल्लाहकारको संख्या बढी भएको विषयमा सार्वजनिक बहस भइरहेका बेला आएको हो। समाचारमा उल्लेख भएअनुसार, पछिल्लो समय प्रधानमन्त्री बालेन्द्र शाह र अर्थमन्त्री वाग्लेबिच सम्बन्ध चिसिएको चर्चा भइरहेका बेला उनको यो टिप्पणी आएको छ।
