काठमाडौं । वेस्ट इन्डिजका अलराउन्डर जस्टिन ग्रिभ्सको घातक बलिङमा पाकिस्तान पहिलो टेस्टको पहिलो इनिङ्समा २८२ रनमा समेटिएको छ। ग्रिभ्सले कुनै पनि रन खर्चिन नदिई ५ विकेट लिँदै आफ्नो टोलीलाई महत्वपूर्ण अग्रता दिलाउन भूमिका खेले।
वेस्ट इन्डिजले पहिलो इनिङ्समा बनाएको ३११ रनको जवाफमा पाकिस्तानले राम्रो सुरुआत गरे पनि अन्तिम चरणमा लगातार विकेट गुमायो। टोलीले अन्तिम ७ विकेट मात्र ३८ रनको अन्तरमा गुमाएपछि २८२ रनमै अलआउट भयो।
३२ वर्षीय ग्रिभ्सले आफ्नो १७औँ टेस्ट खेलमा पहिलो पटक पाँच विकेट लिने उपलब्धि हासिल गरेका हुन्। उनले लगातार पाँच ओभर 'विकेट मेडन' बलिङ गर्दै पाकिस्तानको ब्याटिङ लाइनअप ध्वस्त पारे। विशेष कुरा के भने, सोही दिनको सुरुआती ६ ओभरमा उनले २७ रन खर्चिए पनि कुनै विकेट लिन सकेका थिएनन्। त्यसपछि भने उनले लगातार पाँच विकेट लिएर खेलको दिशा नै परिवर्तन गरिदिए।
ग्रिभ्सले पाकिस्तानका कप्तान शान मसुदलाई १०९ रनमा बोल्ड गर्दै आफ्नो विकेट यात्रा सुरु गरेका थिए। त्यसपछि उनले आमेर जमाललाई बोल्ड, अली उस्मानलाई एलबीडब्लू र मोहम्मद रिजवान तथा मोहम्मद अब्बासलाई विकेटकिपरमार्फत क्याच आउट गराउँदै पाँच विकेट पूरा गरे।
खेलपछि ग्रिभ्सले कप्तान रोस्टन चेसले आफूलाई अनुशासित भएर बलिङ गर्न र टोलीका लागि विकेट निकाल्न प्रोत्साहित गरेको बताए। उनले पिचबाट राम्रो सहयोग पाएकाले त्यसको पूरा फाइदा उठाउन सफल भएको उल्लेख गर्दै टेस्ट क्रिकेटमा पहिलो पटक पाँच विकेट लिन पाउँदा निकै खुसी लागेको प्रतिक्रिया दिए। साथै, खेलमा अझै धेरै काम बाँकी रहेकाले दोस्रो इनिङ्समा पनि त्यही लय कायम राख्ने प्रयास गर्ने उनले बताए।
