अमेरिकाको भर्जिनियास्थित मनासास पार्कबाट सन् २०२४ को अगस्ट महिनामा बेपत्ता भएकी २८ वर्षीया नेपाली नर्स ममता काफ्ले भट्टको खोजी कार्य र अनुसन्धानमा नयाँ फरेन्सिक (न्यायवैज्ञानिक) प्रमाण फेला परेको छ । अदालतमा दर्ता भएका नयाँ कागजात र फरेन्सिक प्रतिवेदन अनुसार अनुसन्धानकर्ताहरूले अभियुक्त श्रीमान् नरेश भट्टको घरबाट बरामद गरेको एउटा विद्युतीय हाते आरा (रेसिप्रोकेटिङ स) मा मानव कपाल र रौँका टुक्राहरू फेला पारेका हुन् । 

 

भर्जिनियाको न्यायवैज्ञानिक विभाग (Department of Forensic Science) द्वारा जारी गरिएको प्रतिवेदन अनुसार उक्त आराको सुक्ष्म परीक्षण गर्दा ३ वटा मानव कपाल जुन नाभिकीय डीएनए परीक्षणका लागि उपयुक्त छन्, १३ वटा मानव कपालका टुक्राहरू जुन डीएनए परीक्षणका लागि पर्याप्त वा गुणस्तरीय छैनन् र अन्य संकास्पद रेशा र फोहोरका कणहरू जस्ता जैविक अवशेषहरू फेला परेका छन्।

फरेन्सिक विज्ञहरूका अनुसार फेला परेका ३ वटा मुख्य कपालहरूलाई विस्तृत डीएनए प्रोफाइल तयार गर्न र उक्त कपाल ममता काफ्लेकै हो या होइन भनी पुष्टि गर्न राज्यको केन्द्रीय 'फरेन्सिक बायोलोजी शाखा' मा पठाइएको छ । यसअघि सोही आरामा ममता काफ्लेको डीएनए प्रोफाइलसँग मिल्दोजुल्दो रगतका दागहरू समेत फेला परिसकेका थिए । 

ममता काफ्ले भट्ट सन् २०२४ को अगस्टदेखि बेपत्ता छिन् र अभियोजकहरूका अनुसार उनको घरकै बेडरूममा हत्या गरिएको दाबी गरिएको छ । यो घटनामा संलग्न रहेको आरोपमा उनका श्रीमान् नरेश भट्टलाई सन् २०२४ को अगस्टमै सुरुमा शव लुकाएको अभियोगमा पक्राउ गरिएको थियो, जसलाई पछि 'फर्स्ट-डिग्री मर्डर' (हत्या) र शव क्षतविक्षत पारेको अभियोगमा स्तरोन्नति गरियो । 

प्रहरीले नरेश भट्टले वालमार्टबाट चक्कु र होम डिपोबाट सरसफाइका सामाग्रीहरू किनेको तथा मध्यरातमा भर्जिनियाका विभिन्न क्षेत्रका डम्पस्टर (फोहोर फाल्ने ठाउँ) मा प्लास्टिकका झोलाहरू फाल्दै गरेको सीसीटीभी फुटेज समेत संकलन गरिसकेको छ । यद्यपि, ममताको शव भने अझैसम्म फेला पर्न सकेको छैन । 

प्रमाणहरूको विशाल परिमाण र डिजिटल डेटाको विश्लेषणका कारण यसअघि धेरै पटक सर्दै आएको नरेश भट्टको मुख्य मुद्दाको ट्रायल आगामी अक्टोबर २०२६ का लागि तय गरिएको छ । कानूनी विज्ञहरूका अनुसार यदि यो नयाँ कपालको डीएनए परीक्षण रिपोर्ट ममता काफ्लेसँग मिल्यो भने यो नरेश भट्टको प्रतिरक्षा टोली का लागि निकै घातक र ठूलो धक्का सावित हुनेछ ।